त्यसैले म हाकिम हुने हो

मलाई कार्यालय, समाज र देश बनाउनु छैन
मलाई घर, परिवार, नातागोता र व्यक्तित्व बनाउनु छ
मलाई सेवा, प्रक्रिया र पद्धति बसाउनु छैन
मलाई मेरो आर्थिक र सामाजिक हैसियत बसाउनु छ
म मितत्व्यी, समय सान्दर्भिक र सेवा उत्तरदायी बन्नु छैन
समाजमा मलाई बाल नदिने,
पढाई तथा जागिरमा म भन्दा अब्बललाई सान दिनु छ,
त्यसैले म हाकिम हुने हो ।

राजनीति आस्था र निष्ठा बदलेर भए पनि,
पैसा खुवाएर भए पनि,
हरेक तिकडम गरेर भए पनि,
म कुनै न कुनै कार्यालयको हाकिम बन्ने हो,
किनकि
मैले त्यही हाकिमको पदमा बसेर,
सरकारी साधन श्रोतको दोहन गरेर,
परिवार र नातागोतालाई तिर्थाटन गराउनु छ ।
सके काठमाडौँ न भए मुख्य सहरमा घर घडेरी जोड्नु छ,
छोरा छोरीलाई डाक्टर इन्जिनियर बनाउने नभए राम्रो देश पठाउनु छ,
कुनै दलको नेता गढ र उच्च घरानाका व्यापारीलाई गुन लगाउनु छ,

नीति, नियम, विधि प्रक्रिया यी त सब कागजी प्रक्रिया हुन्,
अनुगमन र परीक्षण त नाम मात्रैका हुन् हाम्रो देशमा
सरकारी जागिर र पैसा खान सके मात्रै हुन्छ
अहिलेसम्म कसैले असुल्न सकेको प्रमाण छ तपाइहरूसँग ?
त्यसैले मात्र कागजी प्रक्रिया पुरा गरेर कमाऊ गर्न सकिने पद हो,
त्यसैले म हाकिम हुने हो ।

मलाई ससुराल र माइतीमा सरकारी गाडी लिएर जानु छ,
साला-साली र भाइ-बैनीको बिहेमा जान सरकारी गाडी लिएर जानु छ,
श्रीमती-श्रीमान् र आफन्तहरूलाई घुमाउन सरकारी गाडी लैजानु छ,
बाल बच्चालाई विद्यालय पुर्‍याउन सरकारी गाडी प्रयोग गर्नु छ,
साथी भाइलाई होटेलमा नास्ता पानी गराएको बिल भुक्तानी गराउनु छ,
नाता गोता भेट्न सरकारी खर्च र गाडीमा जानु छ,
मलाई मामाको खर्चमा फुपूको श्राद्ध गर्नु छ
त्यसैले म हाकिम हुने हो ।
http://www.prasashan.com/2019/04/27/116970/