घोषणा पत्रको विश्वासनियता कति ?

घोषणा पत्रको विश्वासनियता कति  ।।

हरेक निर्वाचन घोषणा भईसकेपछि प्रत्येक दलले एउटै मूलुक र मूलुकका जनतालाई सुख, सयल, सेवा र सुविधाको लागि फरक-फरक तरिकाले विभिन्न किसिमका आगामी योजनाका घिउका लड्डुहरु जनतलाई दिने वस्तु हो चुनावी घोषणा पत्र । हुन त घोषणा पत्र नाम नै यस्तो भएर होला दल र तिनीहरुका नेतृत्वले घोषणा मात्र गर्ने र कार्यान्वयन नगर्ने । आगामी स्थानीय निकायको निर्वाचनमा पनि प्रत्येक दलले विभिन्न किसिमका आस्वसनका पोकाहरुको संग्रह घोषणा पत्र सार्वजनिक गरि सकेका छन् जुन अध्यन गर्दा हामीले कल्पना गरेको स्वर्ग तपाई हाम्रो मूलुक बन्दै छ तर व्यवहारमा भने हामीले कहिल्यै अनुभूति गर्न पाएका छैनौ  । आगमी योजना यस्तो दुरगामी बनाउने दल र दलका नेतृत्वले किन वर्तमान र भूतकालमा जनतलाई विना घोषणापत्र चुनाब जित्ने माहोल बनाउन सकिरहेका छैनन त ? यो प्रश्न हामीहरुले बुझ्नु जरुरी छ ।  

दल र तिनका नेतृत्वले घोषणा पत्र  यसरी सार्जनिक गरेका छन् जुन ईतिहासमा पहिलो हो तर यो पक्कै होईन यसै गरी हामीहरु दल र नेतृत्वको लागि बलीका बोका बनेका छौ । हामीलाई घोषणा पत्रमा कार्यान्वयन हुने यथेष्ठ प्रमाणा नभईकन हामीले विश्वास गर्ने नगरौं । किनकी तपाई हामीलाई घोषणा पत्रको हरियो घाँस हाल्ने दलहरुले यस भन्दा अगाडि पनि धेरै पटक निर्वाचन जिती सत्ताको बागडोर सम्हाली सकेका छन् । खै त्यो बेला यिनीहरुले तपाई हामी जनताका लागि के गरे ? गरे त आफ्ना परिवार, आफन्त र कार्यकर्तालाई ।  हामीलाई भन्दै गरेको विकास निर्माण यिनीहरुले गरेको होईन यो समय अनुसारको बिकास हो । हामीलाई पद्दती चाहिएको हो खै कुनै दलको घोषणा पत्रमा छ हामीले देशको पद्दती बदल्छौ भन्ने । कसैको पनि सोच छैन पद्दती बसाल्ने जसरी हुन्छ जनतालाई विभिन्न प्रलोभनको प्याकेज घोषणा पत्रको भरमा निर्वाचन जिति देशलाई अनिर्णयको बन्दी बनाउने काम भन्दा अरु अहिले सम्म हामीले केही देख्न र भोग्न पाएका छैन । यसलाई पढ्दै गर्दा कति जनाले भन्नु पनि होला देशमा हुदै नभएको चाहि होईन धेरै भएको छ, हो धेरै भएको छ तर धेरै हुनकालागि भएको छ कि धेरै कमाउनका लागि यो पनि अनुत्तरित नै छ । 

निर्वाचनको मुखमा जनतालाई आश्वसनको भ्रमरुपी घोषणा पत्रको आधारमा निर्वाचन जित्ने दुस्वपना नदेख्न दल र तिनीहरुको नेतृत्वलाई खबरदारी गरौं । घोषणा पत्र लाई ठोस कार्यान्वयनमा ल्याउने यथेष्ठ प्रमाणहरु सहितका योजना जसले तपाईहामी सामू देखाउछन तिनीहरुलाई नेतृत्व सम्हाल्न दिऔ । यसमा पनि तपाई हाम्रो गाउँ ठाउँलाई कर्मभूमी मान्ने नेतृत्वलाई निर्वाचित गराऔं नकि पैसाले टिकट किन्ने नेतालाई । दल र दलका नेतृत्वले सार्वजनिक गर्ने घोषणा पत्रको विश्वासनियता कति भन्ने कुरा जनताले भन्दा दलहरुले बुझ्नु जरुरी छ नकी हावादारी महत्वकांक्षी योजनाहरुको भरमा चुनाब जित्ने दुस्वपना देख्ने प्रयास नगरौं । घोषणा पत्रलाई धार्मिक ग्रन्थहरु जस्तो सत्यतामा आधारित बनाऔं नकि जनतालाई भ्रम छर्ने योजना । घोषणा पत्रमा भन्दा विगतका काम र कार्यान्वयनलाई पनि जनता सामू छर्लङ्ग पारौं जुन कुरा जनताले बिगतमा अनुभूती गरेका होउन । हरेक राजनितिक दलहरुले आफ्नो घोषणा पत्रको विश्वासनीयताको तागतलाई अनुमान गरौं ताकि जनताले अनुमान गरेको विश्वासनियतामा दलहरुले गरेको विश्वासनियता कमजोर नपरोस । 

मिति २०७४ साल बैसाख २० गतेको राष्ट्रिय दैनिक अन्नपूर्ण पोष्टमा प्रकाशित बिचार